कोरबा (चैनपुर ) सर्कल मं गोंडवाना सम्मेलन के तैयारी बर बैठक संपन्न
कोरबा, छत्तीसगढ़। 02/11/2025
चैनपुर सर्कल के ग्राम झाबर मं आज बूढ़ा देव के पवित्र स्थल मं सर्कल स्तरीय सामाजिक बैठक रखे गे रहिस।
ए बैठक के मुख्य बात रहिस – आवत बछर होइय्या पहिली वार्षिक गोंडवाना सम्मेलन के तैयारी के बारे मं विचार-विमर्श करना।
बैठक के सुरुआत बूढ़ा देव के पूजा-पाठ ले होइस। सबे समाज जन मन धरती माता, जंगल-जमीन अउ अपन पुरखा मन ला नमन करत, समाज के एकता अउ उन्नति बर संकल्प लीस।
बैठक के अध्यक्षता कृष्णा उइके करिन अउ संचालन बसंत कोर्राम (सर्कल अध्यक्ष) करिन।
ए बैठक मं सर्कल के सब ग्राम – झाबर, सिरकी खुर्द, बतारी, बेल्टीकरी अउ चैनपुर ले समाज जन बड़ी संख्या मं शामिल होय रहिन।
बैठक मं समाज के वरिष्ठ जन बाबूलाल कोर्राम, सुजान सिंह उइके, सीताराम राज, बुधवारा कोर्राम, अउ मातृशक्ति प्रतिनिधि प्रभा पोर्ते के संग दूसर जिम्मेदार लोगन मन भी उपस्थिति रहिन।
युवा टोली मं हेमंत, प्रकाश, सतीश, संदीप, रमेश, गणेश अउ अनेकों नवजवान मन सक्रिय रूप ले भाग लेके सम्मेलन के सफलता बर अपन सुझाव देविन।
युवा मन कहिन – “ए सम्मेलन हमन के संस्कृति अउ पहिचान के प्रतीक हे, एला हम सब मिलके एक आंदोलन बनाबो।”
बैठक मं एकमत ले निर्णय होइस कि आवत 10 दिसंबर (शहीद वीर नारायण सिंह बलिदान दिवस) के दिन पहिली वार्षिक गोंडवाना सम्मेलन के आयोजन कराय जाही।
ए सम्मेलन समाज के एकता, शिक्षा, संस्कृति अउ स्वाभिमान ला बढ़ावा देही।
तैयारी बर सर्कल के हर ग्राम मं बारी-बारी ले बैठक कराय जाही, ताकि सबे गांव के समाज जन जुड़ सकें अउ अपन जिम्मेदारी निभा सकें।
कार्यक्रम मं समाज के विशेष अतिथि, विद्वान अउ जनप्रतिनिधि मन ला आमंत्रित करय जाही।
साथ मं सर्कल के पढ़ई, नौकरी अउ समाज सेवा मं बढ़िया काम करे वाले विद्यार्थी मन ला सम्मानित करे जाही।
ए सम्मेलन मं मातृशक्ति, युवा अउ सांस्कृतिक दल मन अपन-अपन विचार रखहीन, अउ पारंपरिक नाचा-गीत, लोक कला के कार्यक्रम भी होही।
एकर जरिए समाज के संस्कृति अउ परंपरा ला नवा पीढ़ी तक पहुँचाय जाही।
बैठक मं सबे सदस्य मन कहिन कि ए सम्मेलन समाज के एकता अउ जागरूकता के दिशा मं इतिहास रचही।
सबे मिलके संकल्प लीस –
“हमन गोंडवाना के अस्मिता, संस्कृति अउ माटी के सम्मान बर एक साथ लड़बो।”
—
🎙️ मुख्य गोएठ
“ए सम्मेलन सिरिफ कार्यक्रम नइ हे —
ए गोंडवाना के आत्मा, संस्कृति अउ जन-जागरूकता के उत्सव हे।”
Author: Shambhoo Dwip
जोहार शंभू द्वीप न्यूज़ चैनल में आपका स्वागत है गोंडवाना की धरती पर आपकी आवाज .... जिस धरती पर जिसकी पहचान हो ,जिस धरती पर उसका नाम हो, आज वही मूल मालिक अपनी पहचान के लिए दर-दर भटक रहा है, बाहर के लोगों का उनकी संस्कृति पर हमला, इसलिए शंभू द्वीप न्यूज़ चैनल गोंडवाना की धरती पर आपका आवाज... हमें सपोर्ट करें
